07:22
བྱ་བྲལ་དཀོན་མཆོག་རྒྱ་མཚོ།
« འདུ་ཤེས་དང་མཐོང་ཚོར་སྐོར་དོགས་སློང་དང་བཅས་རགས་བསྡུས་སུ་བཀོད་པ »
ཕ་མཐའ་མི་ངོམས་གཞུང་ལུགས་རབ་འབྱམས་རྒྱ་མཚོའི་འཇིངས་ལ་རབ་རྩེན་ཅིང་།།
དེང་གི་ཤེས་རིག་རྫས་འཕྲུལ་བཀྲ་ལ་ཡངས་དག་རྣམ་དཔྱོད་འོད་ཀྱིས་ནི།།
བདག་པས་གཞན་གཅེས་གོ་ལའི་ཁྱོན་ལ་དབང་བསྒྱུར་འཇིག་རྟེན་མིག་གཅིག་པུ།།
ལྷ་གཅིག་བླ་མར་བཏུད་ནས་མཐོང་ཚོར་བསྙེལ་གསོའི་སླད་དུ་དགོད་པར་སྤྲོ།།
དེ་ཡང་འདུ་ཤེས་དང་མཐོང་ཚོར་སྐྱེ་ལུགས་འདི་ལ་གལ་ཆེ་བའི་རིམ་པ་གསུམ་ཞིག་གི་སྒོ་ནས་བཤད་ན། དང་བོ་ཚོར་སློང་སྐྱེ་བ། གང་ཚོར་བ་དེ་ཉིད་ནང་འདྲེན་གྱིས་ཀློག་འགྲེལ་བྱེད་པ། དེ་ལ་ཡ་ལན་སྤྲོད་པ་བཅས་གསུམ་མོ།། དང་བོ་ལ་མཐོང་ཚོར་སྐྱེ་རིམ་དང་། དེ་འབྲེལ་གྱི་དོགས་པ་སློང་བ་གཉིས། དང་བོ་ནི། ང་ཚོས་ཕར་གཟུགས་ལ་ལྟ་སྐབས་ཕྱིའི་གཟུགས་བརྙན་ལས་ཕྱིར་ལྡོག་སྟེ་འཕྲོས་པའི་འོད་མདངས་དེ། ཐོག་མར་མིག་གི་སྤྱིན་སྐྱི་བརྒྱུད་འཇའ་སྐྱིར་ཕོག་ལ། འཇའ་སྐྱི་བརྒྱུད་ནས་མིག་གི་རྒྱལ་མོར་ཕོག འཇའ་སྐྱི་ཡིས་མིག་ནང་དུ་ཞུགས་རྒྱུའི་འོད་ཀྱི་འབོར་ཚད་ལ་ཚོད་འཛིན་བྱེད་ཅིང་། དེའི་རྐྱེན་པས་འོད་ལ་བཀྲག་མདངས་ཆེ་བའི་སྐབས་སུ་མིག་གི་རྒྱལ་མོ་འཁུམ་པ་དང་། ཞན་པའི་ཚེ་ཆེ་རུ་འགྲོ་བ་སོགས་བྱེད། དེ་ལྟར་འོད་ཀྱི་འབོར་ཚད་སྙོམས་སྒྲིག་ལྟ་བུའི་སྒོ་ནས་དྭངས་གཟུགས་བརྒྱུད་དྲ་སྐྱིའི་ངོས་ཀྱི་འོད་ཚོར་སྣེ་ལེན་པར་ཕོག་པ་ན་ཡུལ་ངོས་ལ་མཐོང་ཚོར་སྐྱེས་པ་ཡིན།
གཉིས་པ་དེ་ལ་དོགས་པ་སློང་བ།
དྲ་སྐྱིའི་འོད་ཚོར་སྣེ་ལེན་པར་བརྡ་འབྱོར་ན། ཕྱིའི་གཟུགས་བརྙན་དེར་མཐོང་ཚོར་སྐྱེ་དགོས་སམ་མི་དགོས། གལ་སྲིད་སྐྱེ་དགོས་ན་མཐོང་ཚོར་ཀླད་ཤུན་ལ་བརྡ་འཕྲིན་མ་འབྱོར་གོང་གཟུགས་སོགས་མཐོང་བ་ཡོད་པར་ཁས་ལེན་དགོས་ལ། དེ་ལྟར་འདོད་ན་མཐོང་ཚོར་ཀླད་ཤུན་ལ་སྐྱོན་ཤོར་བ་བས་ཡུལ་དངོས་མི་མཐོང་བར་བཤད་པ་དང་འགལ་ན། ཇི་ལྟར་འགལ་སྤོང་བྱེད། མཐོང་ཚོར་མི་སྐྱེ་ཟེར་ན། འོ་ན་ཁ་དོག་སོགས་ལ་མཐོང་ཚོར་སྐྱེས་ན་ངེས་པར་ཀླད་པར་ཆ་འཕྲིན་འབྱོར་དགོས་པར་ཐལ་ལ། དེ་ལྟ་ན་༼ འདུ་ཤེས་དང་མཐོང་ཚོར་སློབ་དེབ༽ ལས། མཐོང་ཚོར་དང་འདུ་ཤེས་གཉིས་ལ་སྔ་ཕྱིར་སྐྱེ་བའི་གོ་རིམ་ངེས་ཅན་བཞག་པ་དང་འགལ་སྙམ། མ་ཟད་ཀླད་མེད་ཕྲ་སྲིན་དག་ལའང་མཐོང་ཚོར་ཡོང་གིན་ཡོད་པ་འདི་ཚན་རིག་མཁས་དབང་ཚོས་ཀྱང་ཁ་གཅིག་གྲག་ཏུ་བཞེད་པ་མིན་ནམ། ཡང་ཕྱིའི་མེ་ཏོག་དཀར་བོ་ཞིག་ལ་མི་དང་སྦྲང་མ་གཉིས་ཀས་བལྟས་པ་ན། འོད་རླབས་དང་འབྲེལ་ཁ་དོག་ཆ་ཚང་ལྡོག་འཕྲོ་བྱ་འམ་མི་བྱ། གཉིས་པ་ལྟར་ན། མིས་ཁ་དོག་དཀར་བོར་མཐོང་བ་འགལ་ལ། ལྡོག་འཕྲོ་བྱ་ན་མི་ལ་དཀར་བོར་སྣང་གིན་ཡོད་པ་ལྟར་ཚད་མ་ཡིན་ན། སྦྲང་མར་ཡང་འདྲ་བས། མེ་ཏོག་དེ་དཀར་དམར་གཉིས་ཀར་ཐལ་བས་སྐྱོན་མེད་དམ།
གཉིས་པ་གང་ཚོར་བ་དེ་ཉིད་ནང་འདྲེན་གྱིས་ཀློག་འགྲེལ་བྱེད་པ།
འདི་ལ་ཡང་ཀློག་འགྲེལ་བྱེད་པ་དང་། དེ་ལ་དོགས་པ་སློང་བ་གཉིས། དང་བོ་ནི། དེ་ལྟར་མིག་གི་དྲ་སྐྱིའི་སྟེང་གི་འོད་ལེན་ཕྲ་ཕུང་དག་ལ་འོད་ཕོག་པ་ལས་འོད་ལེན་ཕྲ་ཕུང་དག་ལ་ངར་ཤུགས་སློང་ལ། དེ་ལས་གློག་བརྡ་བྱུང་བ་རྣམས་མིག་གི་རྩ་ལམ་བརྒྱུད་འཕྲེད་ཀྱི་ལྷ་ངའི་ཀླད་ཞོ་དང་། དེ་ནས་ཡར་མཐོང་ཚོར་ཀླད་ཤུན་ལ་འབྱོར་བ་རེད། ཀླད་ཤུན་འདི་ལ་རིམ་པ་མང་དུ་ཡོད་པ་ལས་“ ཝི ” ༡ ནས།“ ཝི་” ༢ བའི་ཀླད་ཤུན་ལ་འཕྲིན་བརྡ་འབྱོར་བ་དང་། དེ་ནས་“ ག་བར” དང་འབྲེལ་བའི་སྟེང་རྒྱུན་བགྲོད་ལམ་དང་། “ ག་རེ” དང་འབྲེལ་བའི་འོག་རྒྱུན་བགྲོད་ལམ་ཕྱོགས་སོ་སོར་གྱེས་འགྲོ་བ་ཡིན། དེ་ལྟར་ཀླད་པའི་ཆ་ཤས་གོང་འོག་འདི་གཉིས་གང་རུང་ལ་བརྡ་འཕྲིན་འབྱོར་བ་ན། ཀླད་པས་སྣང་བརྙན་ལ་“ དེའོ་འདིའོ ” སྙམ་དུ་ཀློག་འགྲེལ་ལམ་འདུ་ཤེས་སྐྱེས་པ་ཡིན།འདི་ལ་དོགས་པ་སློང་བ།
མཐོང་ཚོར་ཀླད་ཤུན་རིམ་པ་དང་བོར་ཆ་འཕྲིན་འབྱོར་ཙ་ན། ཁ་ཕྱོགས་བསྟན་ཚུལ་ཐོན་དགོས་པར་གསུངས་ལ། དེ་ལྟར་ན་གཙུག་འདབ་ཆ་ཁུལ་དུ་ཡང་“ ག་བར་དང་འབྲེལ” ཟེར་བ་ཡང་ཁ་ཕྱོགས་༼ དཔེར་ན་ཕོར་བ་གང་དུ་འདུག་ཟེར་བས་ཁ་ཕྱོགས་འཚོལ་བ་ལྟ་བུ༽ ལ་གོ་དགོས་པས་འདིའི་ཀླད་ཤུན་གོང་འོག་གི་བྱེད་ལས་སོ་སོར་ཇི་ལྟར་འབྱེད་དམ། དེ་བཞིན་མཐོང་ཚོར་ཀླད་ཤུན་བཞི་བས་ཀྱང་དབྱིབས་འགྲོས་ཀྱི་རྣམ་པ་མཐོང་བ་དང་ཚོད་འཛིན་བྱེད་ལ། རྣ་ལྟག་རྒྱབ་རོལ་ཀླད་ཤུན་གྱིས་ཀྱང་བཟོ་དབྱིབས་སོགས་མཐོང་བར་བཤད་པས། ཀླད་ཤུན་འདི་དང་། ཝི ༤ ཀླད་ཤུན་གཉིས་པར་ལ་དབྱིབས་འཛིན་ཚུལ་མ་འདྲ་བའི་ཆ་ག་འདྲ་ཡོད། ད་དུང་ཀླད་ཤུན་ཝི་༤ བས། ཁྲ་བོ་དང་ལྡན་པའི་དབྱིབས་འགྲོས་དེ་མཐོང་སྐབས་སུ། དབྱིབས་འགྲོས་དང་འབྲེལ་བའི་ཁ་དོག་སྣ་ཚོགས་པ་ལ་འདུ་ཤེས་སོ་སོ་བ་འམ། ཡང་ན་གཅིག་ཁོ་ན་བསྐྱེད་པ་ཡིན། ཡང་ན། དབྱིབས་གྲུ་བཞི་ཞིག་ལ་བལྟས་པ་ན། དབྱིབས་དེའི་འབུར་ཚད་དང་མཉམ་ཚད་གཉིས་མཐོང་བའི་འདུ་ཤེས་གཅིག་གྱུར་རམ། ཡང་ན་སོ་སོ་བ་འམ་དུས་སྔ་ཕྱིར་སྐྱེ་བ་སོགས་དཔྱད་པར་བྱ་བ་ཅུང་ཡོད་སྙམ།
གསུམ་པ་ཡ་ལན་སྤྲོད་པ། འདི་ལ་ཡ་ལན་སྤྲོད་ལུགས་དང་། དེ་འབྲེལ་གྱི་དོགས་པ་སློང་བ་གཉིས། དང་བོ་ནི། གང་ལ་འདུ་ཤེས་སྐྱེ་སའི་ཡུལ་དངོས་མིག་གིས་མཐོང་ཞིང་བལྟ་རུ་འཇུག་པ། ལག་པས་རེག་པ་དང་ཡར་འདེགས་པར་བྱེད་པ་སོགས་ལྟ་བུའོ།།
གཉིས་པ་དོགས་པ་སློང་བ།
ཀླད་པས་ཐོག་མར་གང་ལ་ཡ་ལན་སྤྲོད་ས་དེ་མཐོང་སྐབས་སུ་ཡུལ་དེའི་གཟུགས་བརྙན་ལྟ་བུ་ཞིག་བརྒྱུད་ནས་མཐོང་ཞིང་ཡ་ལན་སྤྲོད་དམ། ཡང་ན་རྣམ་མེད་རྗེན་པ་རང་དུ་མཐོང་བ་ཡིན། གལ་སྲིད་རྗེན་པར་མཐོང་གིན་ཡོད་ན། དྲ་སྐྱིར་ཕོག་པའི་གཟུགས་བརྙན་དེ་ཀླད་པར་དབོར་འདྲེན་བྱེད་པ་ན། ཀླད་པས་སྣང་བརྙན་དེ་གཞིར་བྱས་པའི་སྒོ་ནས་ཡུལ་ལ་འོས་འཚམ་གྱི་ཡ་ལན་སྤྲོད་དགོས་པ་མིན་ནམ། ཡིན་ན་འདྲ་རྣམ་ལྟ་བུར་འགྱུར་ལ། གལ་སྲིད་འདྲ་བའི་རྣམ་པ་དང་བཅས་ཏེ་མཐོང་གིན་ཡོད་ན། མིག་གིས་ཕྱིའི་གཟུགས་སོགས་མཐོང་བྱའི་ཡུལ་དང་དངོས་སུ་ཕྲད་པའི་སྒོས་བཟུང་བ་དང་། ཡུལ་དང་མ་འཕྲད་ཀྱང་སྔར་མཐོང་ཟིན་པ་ཀླད་པར་ཉར་ཚགས་བྱས་ཏེ། ཕྱིས་སུ་གཟུགས་ཁོ་རང་དངོས་སུ་མེད་ནའང་ཀླད་པར་འཆར་སྣང་ངམ་གཟུགས་བརྙན་ཞིག་ཤར་རྒྱུ་ཡོད་པས། དེའི་སྒོ་ནས་ཡུལ་ལ་འདུ་ཤེས་པ་ན་ཡུལ་རྗེན་པར་རམ་ཡང་ན་འདྲ་བའི་རྣམ་པ་ཙམ་དུ་བཟུང་བ་ཡིན། འདིའི་གོང་འོག་གཉིས་ལ་ཁྱད་ཡོད་དམ་མེད།འདུ་ཤེས་མཐོང་ཚོར་སྐྱེ་རིམ་དོགས་གཅོད་བཅས།།
བརྒྱ་ཕྲག་སྒོ་མོའི་ཆ་ཙམ་ལ་བརྩོན་པ།།
འདི་ཡང་ཚན་རྩལ་གཟི་འོད་རབ་འབར་བའི།།
དུས་རབས་ཤིག་གིས་བསྐུལ་བ་མིན་ནམ་སྙམ།།
No comments
Post a Comment