06:09
ཀློག་གྲངས། 2370
བསྟན་པ་དར་རྒྱས།
འཇིག་རྟེན་ཁམས་ལ་ཐོག་མཐའ་ཡོད་མེད་དང་།།
རང་བྱུང་སྣོད་བཅུད་སྐྱེ་འཇིག་བྱེད་པའི་ཚུལ།།
ཕྲ་རབ་རྡུལ་གྱི་ཡིན་ལུགས་གང་ཡིན་སོགས།།
དཔྱད་པའི་ཐབས་ཚུལ་སྣ་མང་ཡོད་པ་ལས།།
རྟེན་འབྱུང་སྨྲ་བའི་གཏན་ཚིགས་འགོད་ལུགས་དང་།།
དངོས་གཙོ་སྨྲ་བའི་ཚད་འཇལ་བརྟག་ཐབས་གཉིས།།
དངོས་པོའི་གཤིས་ལ་ལྟ་བའི་མིག་ཡིན་པས།།
གཟུར་གནས་མཁས་པ་འདི་ལ་དགའ་བས་འཇུག།
ནམ་མཁའི་དབྱིངས་ཀྱི་སྐར་ཚོགས་ཁྲ་མོ་དང་།།
ས་རུ་སྐྱེས་པའི་རྩི་ཤིང་ནགས་ཚལ་སོགས།།
མངོན་སུམ་མིག་གིས་མཐོང་བ་རགས་པའི་གཟུགས།།
ཕྲ་རབ་རྡུལ་གྱིས་བརྩམས་པར་བསྙོན་དུ་མེད།།
རྩོམ་གཞི་རྡུལ་གྱི་ངོ་བོ་རྟག་མི་རྟག།
དེ་ཡི་ཚད་དང་ཆ་ཤས་ཡོད་མེད་སོགས།།
ཕྱི་ལོའི་སྔོན་ནས་ད་ལྟའི་བར་དུ་ཡང་།།
ཤར་ནུབ་མཁས་པས་རྩོད་སྒྲུབ་ཟམ་མི་ཆད།།
ཆེས་ཆེར་སྔ་བ་ཕྱི་ལོའི་སྔོན་གྱི་དུས།།
མུ་སྟེགས་ལུགས་ཀྱི་བྱེ་རིག་བསྟན་བཅོས་སུ།།
འབྱུང་བཞིའི་རྡུལ་ཕྲན་ཆ་མེད་རྟག་པ་ལས།།
དང་བོའི་འཇིག་རྟེན་རིམ་གྱིས་ཆགས་པར་བཤད།།
 |
| གནའ་བོའི་མུ་སྟེགས་པའི་རྡུལ་ཕྲན་གྱི་དཔེ་རིས་ཤིག |
དེ་ཡི་ལུགས་ལ་འཇིག་རྟེན་རྩོམ་གཞིའི་རྡུལ།།
ངོ་བོ་རྟག་ཅིང་ཡན་ལག་ཅན་གྱི་རྒྱུ།།
ཆ་ཤས་མེད་ཅིང་དབྱིབས་ནི་ཟླུམ་པོ་དང་།།
རགས་པ་རྩོམ་ཚེ་ཕན་ཚུན་མ་རེག་འདོད།།
འདུལ་བ་ལུང་དང་རྒྱ་ཆེར་རོལ་བའི་མདོ།།
ངོ་བོ་རྟག་ཅིང་ཡན་ལག་ཅན་གྱི་རྒྱུ།།
ཆ་ཤས་མེད་ཅིང་དབྱིབས་ནི་ཟླུམ་པོ་དང་།།
རགས་པ་རྩོམ་ཚེ་ཕན་ཚུན་མ་རེག་འདོད།།
འདུལ་བ་ལུང་དང་རྒྱ་ཆེར་རོལ་བའི་མདོ།།
དུས་འཁོར་རྒྱུད་དང་མངོན་པ་གོང་འོག་གཞུང་།།
དབུ་མ་ཐལ་རང་བསྟན་བཅོས་སོ་སོ་ནས།།
ཕྲ་རབ་རྡུལ་ལ་ཞིབ་མོས་དགག་བཞག་མཛད།།
དུས་རབས་གཉིས་པར་བྱུང་བའི་མངོན་པའི་གཞུང་།།
ཆོས་མངོན་སྙིང་བོ་དང་ནི་བྱེ་བྲག་བཤད།།
དེ་ཡི་གནད་བསྡུས་སློབ་དཔོན་དབྱིག་གཉེན་མཛོད།།
རྩ་འགྲེལ་སོགས་ལས་རྣམ་བཞག་འདི་སྐད་གསུངས།།
འབྱུང་བ་བཞི་དང་འབྱུང་འགྱུར་བཞི་བོ་བཅས།།
རྡུལ་རྫས་བརྒྱད་འདུས་སྟེང་ནས་རགས་གཟུགས་གྲུབ།།
ཆ་མེད་གཟུགས་ཀྱི་ཆ་ཤས་མཐར་ཐུག་པ།།
ཆ་མེད་ཕྲ་རབ་རྡུལ་ཞེས་ཐ་སྙད་མཛད།།
ངོ་བོ་མི་རྟག་ཆ་ཤས་མེད་པ་སྟེ།།
དབུས་རྡུལ་གཅིག་ལའང་ཕྲ་རབ་གཞན་གྱིས་བསྐོར།།
གཟུགས་ཀྱི་ཆུང་མཐའ་ཡིན་པའི་ཕྲ་རྡུལ་རྣམས།།
ཕན་ཚུན་མ་རེག་བར་བཅས་བྱེ་སྨྲ་འདོད།།
ངོ་བོ་རྟག་དང་མི་རྟག་ཕྱི་ནང་རྩོད།།
མ་རེག་བར་བཅས་ཡིན་མིན་བྱེ་མདོ་རྩོད།།
ཕྱི་རོལ་དོན་དུ་གྲུབ་མིན་མདོ་སེམས་རྩོད།།
ཆ་བཅས་ཡིན་མིན་མངོན་པ་གོང་འོག་རྩོད།།
ཆ་མེད་ཕྱི་དོན་རྩོམ་གཞི་བྱེ་མདོ་བཞེད།།
ཟླུམ་པོ་ཡིད་ངོར་སྣང་ཙམ་སེམས་ཙམ་བཞེད།།
རྡུལ་རྫས་བརྒྱད་འདུས་རྫས་ཡོད་ལེགས་ལྡན་བཞེད།།
བཏགས་ཡོད་རྟོག་བཏགས་ཙམ་ཞིག་ཟླ་བ་བཞེད།།
སྟོང་བའི་རྡུལ་དང་ས་ཆུ་མེ་རླུང་རྡུལ།།
ནམ་མཁའི་རྡུལ་སོགས་དུས་འཁོར་གཞུང་ལས་གསུངས།།
བརྟེན་ནས་བཏགས་པས་སྟོང་བའི་རྡུལ་ཞེས་བཏགས།།
མངོན་པར་སྐབས་ཡོད་ཆུང་མཐའ་ནམ་མཁའི་རྡུལ།།
ཕྲ་རྡུལ་བདུན་དུ་བསྒྱུར་བ་རྡུལ་ཕྲན་ཚད།།
ལྕགས་ཆུ་རི་བོང་ལུག་དང་གླང་གི་རྡུལ།།
ཉི་ཟེར་སྲོ་མ་དེ་ལས་བྱུང་བ་དང་།།
ནས་དང་སོར་ཚིགས་སོར་མོ་ཞེས་བྱའི་བར།།
བདུན་བདུན་བསྒྱུར་ཏེ་གཟུགས་ཅན་ཆུང་མཐའི་ཚད།།
འཇལ་བའི་ཐབས་ཚུལ་ཆོས་མངོན་མཛོད་ལས་གསུངས།།
རྒྱ་ཆེར་རོལ་དང་འདུལ་བའི་བཀའ་བསྟན་ལས།།
དེ་དང་ཅུང་ཟད་མི་འདྲའི་ཚུལ་ཡང་འབྱུང་།།
དེ་ལྟ་ན་ནི་ཕྲ་རབ་རྡུལ་གྱི་ཚད།།
མིག་གིས་མཐོང་བའི་ཆུང་མཐའ་ཉི་ཟེར་རྡུལ།།
དེ་ལ་ཆ་ཤས་ཕྱེ་བ་འབུམ་ཕྲག་བརྒྱད། །
ཉིས་ཁྲི་སུམ་སྟོང་ལྔ་བརྒྱ་ཞེ་གསུམ་ཆ།།
དེང་དུས་དངོས་ཁམས་རིག་པའི་གཞུང་ལུགས་ཀྱི།།
རྡུལ་ཕྲན་རྣམ་བཞག་ཞིབ་མོར་ལྟོས་འཇོག་གིས།།
འདི་ཡང་རགས་པའི་དཔྱད་པ་ཙམ་མོ་ཞེས།།
ཐམས་ཅད་མཁྱེན་པས་རྡུལ་སྙེད་འཇིག་རྟེན་གསུངས།།
ཡེ་ཤུའི་སྔོན་གྱི་དུས་རབས་ལྔ་བ་ནས།།
ནུབ་ཕྱོགས་ཡུལ་ལའང་ཕྲ་རྡུལ་རྣམ་བཞག་བྱུང་།།
གྷི་རིག་མཁས་རྣམས་བེམ་གཟུགས་རྩོམ་པའི་གཞི།།
ཨེ་ཊོམ་ཞེས་བྱ་ཆ་མེད་རྡུལ་དུ་བཞེད།།
 |
| ཨེ་རི་སི་ཊོ་ཊལ་ |
ཨེ་རི་སི་ཊོ་ཊལ་ཞེས་པའི་མཁས་པ་དེས།།
ས་ཆུ་མེ་རླུང་རྫས་རྡུལ་སོ་སོ་ཡིས།།
བེམ་གཟུགས་རགས་པ་གྲུབ་པའི་རྣམབཞག་ནི།།
ལོ་ངོ་ཉིས་སྟོང་ཡུན་ལ་བརྟན་པོར་གནས།།
 |
| ཌལ་ཊོན |
དུས་རབས་བཅུ་དགུའི་སྟོད་ལ་ཌལ་ཊོནགྱིས།།
དངོས་པོའི་ཆུང་མཐའ་ཆ་མེད་རྡུལ་ཕྲན་ཞེས།།
སྔོན་གྱི་ཨེ་ཊོམ་རྣམ་བཞག་བསྐྱར་གསོ་བྱས།།
དེའི་ཚེའང་ཨེ་ཊོམ་ཆ་ཤས་མེད་པར་བརྩིས།།
 |
| ཌལ་ཊོན་གྱི་རྡུལ་ཕྲན་དཔེ་གཟུགས། |
ཟད་མེད་དུས་ཀྱི་བཞུར་རྒྱུན་རིང་མོའི་ཁྲོད།།
ཚན་རྩལ་རིག་པའི་རྦ་རླབས་ཤུགས་ཀྱིས་འཕྱུར།།
ཕྱིས་ཀྱིས་མཁས་པ་དག་གི་ཞལ་སྒོ་ནས།།
ཕྲ་རབ་རྡུལ་ལ་རྣམ་བཞག་གསར་བ་བྱུང་།།
 |
| རྡུལ་ཕྲན་གྱི་དཔེ་རིས། མཐའ་ན་མོ་རྡུལ་འཁོར། ལྟེ་བར་ཕོ་རྡུལ་དང་མ་ནིང་རྡུལ་འདུས། |
རྡུལ་ཕྲན་གཟུགས་ཀྱི་ཆུང་མཐའ་མ་ཡིན་ཏེ།།
དེ་ནི་ཕོ་མོ་མ་ནིང་རྡུལ་གྱིས་གྲུབ།།
ཕོ་རྡུལ་བར་རྡུལ་སྐྲུན་བྱེད་ཁོག་རྡུལ་ཡང་།།
རྡུལ་ཕྲན་ཆ་ཤས་ཡིན་པ་ཞིབ་པར་འགྲེལ།།
དེ་ནི་ཕོ་མོ་མ་ནིང་རྡུལ་གྱིས་གྲུབ།།
ཕོ་རྡུལ་བར་རྡུལ་སྐྲུན་བྱེད་ཁོག་རྡུལ་ཡང་།།
རྡུལ་ཕྲན་ཆ་ཤས་ཡིན་པ་ཞིབ་པར་འགྲེལ།།
 |
| ལྟེ་རྡུལ་ནང་ཕོ་རྡུལ་དང་མ་ནིང་རྡུལ་དག་ཁོག་རྡུལ་གྱིས་གྲུབ་པ་ཡིན། |
རྡུལ་ཕྲན་ཚད་ནི་ཆུ་ཡི་ཐིགས་པ་གཅིག།
མི་འཁྲུགས་ཆེན་པོ་བཅུ་ལ་བགོས་པའི་ཆ།།
གཅིག་ཙམ་ཡིན་ཞེས་དེང་དུས་དངོས་སྨྲ་བཞེད།།
དེ་ལ་ཡང་ནི་ཆ་ཤས་ལྡན་པར་འདོད།།
འཇིག་རྟེན་ཁམས་དང་ལོ་ཚོད་མཉམ་པའི་རྡུལ།།
ད་ལྟ་ཁྱོད་ཀྱི་ལུས་ལ་ཡོད་པར་སྨྲ།།
མཁྲེག་གཟུགས་གསེར་གྱི་ནང་གི་རྡུལ་ཕྲན་ཡང་།།
རྟག་ཏུ་གཡོ་འགུལ་བྱེད་པ་ཡིན་ཞེས་ཟེར།།
 |
| རྡུལ་ཕྲན་ནང་གི་རྡུལ་རྣམས་ཕན་ཚུན་བཟུང་ཚུལ་གྱི་དཔེ་རིས། |
ལྟེ་རྡུལ་དང་ནི་གློག་རྡུལ་མ་འཕྲད་ཀྱང་།།
སོ་སོར་མི་འགྲོ་གློག་གི་ཤུགས་ཀྱིས་བཟུང་།།
དབུས་ཀྱི་ལྟེ་རྡུལ་འཐོར་དུ་མེད་པ་ཡང་།།
དྲག་པའི་ལྟེ་ཤུགས་ཟེར་བས་བཟུང་བར་བཤད།།
མ་རེག་ན་ཡང་ཤུགས་ཀྱིས་བཟུང་བའི་ཚུལ།།
བྱེ་སྨྲས་མ་རེག་བར་བཅས་འདོད་དང་མཚུངས།།
ཐོག་མའི་རྡུལ་ཕྲན་ད་ལྟའང་ཡོད་ཅེས་པ།།
བྱེ་རིག་ལུགས་ཀྱི་རྟག་པའི་རྡུལ་དང་འདྲ།།
ད་ལྟའི་དུས་སུ་ཆ་ཤས་མེད་པར་བརྩི།།
བལྟ་བྱའི་ཡིན་ལུགས་ལྟ་བྱེད་ཡུལ་ཅན་ལ།།
ལྟོས་པར་ཚད་རྡུལ་ཤུགས་རིགས་སྨྲ་བས་འདོད།།
2019/12/18
📖
No comments
Post a Comment